"Lalpa hming chu kulbîng dettak a na, mifel chu chu taka chun a tlan lût a, a him hlak.''
Lalpa hming chu kulbîng dettak a na, mifel chu chu kulbîng ah chun a tlan lût a, a him hlak.
Israelhai moab phaiah an um lâi khan Mosien Levi chihai umna ding khuo a lo ruotpêk diem a, chuel khawm chu ni lo, tuolthattu chunga rorêl dân ding chenin a hrilsa bawk a nih.
Mosie chu Moab phaiah chun a hung thi tah a, Israelhai chu Joshua in a hung țhuoi nawk tah a, Kanan ram a hang lût khan Mosien a lo hril hai chu an buotsei ta a, Ram an hungin sem țan ta a nih.
Josef thlahai chun Jordan râltieng an chang a, Juda thlahai chun Edom ramri simtieng zin thlalêr chen an chang a, Ephraim le Manasse thlahaiin Jeriko zâwn, ..... khang ang khan ram an in siem tlang duol duol a, an ram insiemna tieng chu hril sêng naw mei nih. Levi chithlahai khawm chun Jeriko zâwn Jordan vadung pangah chun ram an chang ve tah a nih.
Jordan thlangtieng khuo pathum ( Kadesh, Sekem le Hebron) a um a, Jordan saktieng khuo pathum bawk ( Bezer, Ramoth le Golan) an um a nih. Hieng khuo paruk hai hi a nih HUMHIMNA khuo chu. Hienghai bâkah hin khuo 42 a la umsa bawk a nih.
Inhumhimna khuo a hin mi tukhawm tuol a that chun a tlanlût ding a nih. Dân sâwmpêk "Tuol that naw" (exo 20:13) ti ni de sienkhawm Tuolthat seng seng khawm hi tuolthat dân a lo in ang tâwl nawk nawh a, thawhrâm, tum leia tuolthat hrim hrim chu that ve nghâl ding a nih. Amiruokchu thawpal, hrietnaw leia tuolthat chu hieng humhimna khuo hai a hin tlanlût a ta, a him ding a nih.
Tuolthattu chungah phuba an lâk nasan tak chu Israelhai kuomah kan Lalpa'n "ka um" a ti leiin a nih. Tuolthat leia thisen suok chun Israel ram Lalpa'n "Ka um na" a ti na ram chu chu thisen chun a sukpawrche a, a sukthienghlim nâwkna ding chun a thattu thisen ngei kha a ngai nawk a nih, ti hi a lo ni a nih.
Awleh, hieng inhumhimna khuohai le Israelhai umna hi an kâr a thla naw êm êm a, Israel rama inthawk chun mêl 30 chau a nih, mêl 30 chu ke in nikhat vêl ei aw hmêl. Israel ram le humhimna khuo hi hnâi êm êm a an buotsei nasan tak chu Tuolthat paltu chun himna a zawng a a tlan chun nikhat chauah himna a hmu nghâl theina dinga hnâi terek a an buotsei a nih. Chu chu ei ta ding chun Matthai in "Tlangsîpa khawpui um chu thuprûk thei ani nawh." (5:14) a lo tih a, Isu Krista sandamna hi a zawng tak tak tu hai ta ding chun hmu a harsa naw hle ti chu a lo in entir a ni chuh.
Humhimna khuo panna ding lampui hi an lo buotsei lâwksa hrim a na, Juda dânah chun chu lampui chu feet 48 a lien a nih. Tuolthattu chu himna a zawnga a hung tlansie pha lampuiah INSUIPAL ti khawm a um naw ding a nih, fâi tak a nih. Ei sandamna lampui hi Lalpa'n a lo buotsei lâwksa vawng ana, Suol sima, suol ngaidamna dinga Isu Krista hminga baptisma changa, A thlarau thienghlim dawng hi a nuom taphawt hai ta ding chun lampui a lien êm êm a, Hi lampui hi thuprûk thei ani nawh a, Pathienin mi po po ta dinga a siem a nih. Isu'n, " kei hi lampui, thutak le hringna chu ka nih" (joh 14:6) a lo ti bawk leiin Hi lampui hi Isu Krista ana, amaa fe naw hai chun himna an hmu thei ngai nawh.
Hieng humhimna khuohai hi Israelhai ta ding chau an nawh a, an ni lâia hnam dang (jentialhai) ta ding khawmin a nih. (Jos 20:9) Lalpa sandamna hi Juda, jential a um nawh, nuhmei, pasal a um nawh. Suok le suok naw a um ta nawh. Juda le jential inpindanna savun puonzâr kha a sa êm êm a, an uoi zie le a sek zie chu khingtieng bâwngchal 7 le khingtieng bâwngchal 7 in kei hai sienkhawm inek lo ding khawp a inuoi a nih. Sienkhawm Isu Krista chun kraws lêrah a thlarau an thla khan chu puonzâr chu a sîpa inthawkin an tlêr suok zak a nih. Judahai hi suol ve angreng an nih, chu puonzâr chu an la țhui țâng țâng a ni chu. A thei chuong ta nawh, Juda le Jential um ta lovin Lalpa Sandamna a chun ei rêngin pumkhat ei hung ti tah a nih.( gal 3:28)
TUOLTHAT DÂN CHIHNI TEKHIN THU LA HEI HRIL LAWK EI TIH.
An buoi nasa khawp el a, an khingpuihai inah ava tlanlût a, a va bei tum ni âwm a nih. A hnungtieng an tlangvâlpa khan a hung sât a, sâwt khawm țhang hman loin a thi nghâl an chu.
Chu chu thawhrâm leia tuolthat a nih.
Nikhat chu tlangvâl pahni hi sa kâpah an fe a, sa an hmu phâta an um dân ding, an position lâk dân dinghai chu an lo inhril vawng ani âwm. Sa chu an hang hmu ta ngei a, pakhat kha a thlangtieng a țhang a, pakhat kha a hung hnawk suk pei a,
Sakâpa fe hai chun an hril hlak a, "sa kâpah ei fe chu, sa mit mengin ei meng a, ei hmu chieng bêk naw hai khawm sa ei sâwn a, ei kâp tum vawng a nih" an lo ti hlak a.
A thlangtienga um pa khawm chun a saka pa, inhmaw loa sa hung zuitu kha a hmu chieng naw leia sa a sâwn ni ngêi a tih. A ruolpa chu a kâp thlum dêr el.
chu chu thawpal, hriet naw leia tuolthat ani chu!
Thawhrâm amani, thawpal leia tuolthattu chu humhimna khuo panin a tlan phawt ding a nih. Nisienlakhawm humhimna khuo a lût hma hin a hnunga phuba lâk tum haiin an va man fûk vei chun hmangaina țhang țhak loa that ding, chu chu thupêk a nih.
Suola thi ta hnung haiin ei hriet le ei i ring chu "Lalpa kuomah kîr ka ta, sandam ni el ka tih" ti hi a nih. Andik ngêi el. Ni khawm ani bawk. Nisienlakhawm Pathien hin ama ei va hmufûk hma hin chu ami lo uksak naw hrim hrim. Tuolthattu kha humhimna pana a hung tlan lâi khan kul nghâktuhai khan an lo va buoipui naw hrim hrim a ni kha. A hnunga phuba lâktum haiin an man fûk vei chun that ani ve nghâl hlak ang khan Pathien kuom tieng ei kîr hrim hrim chun muongna chi ani nawh, setan hin ami lo hnawt hlak a nih.
Tuolthattu chu kul sûngah chun tlan lût a ta, rorêltuhai kuomah chun kul a lût nasan hril a ta, rorêltuhai chun tuolthattu chu Puithiemhai kutah an pêklût ding a nih. Rorêltuhaiin tuolthattu hi Puithiemhai kutah an va pêk lût ta hnung hin chu la thaw tum a, la va ûmzui ngam chi an ta nawh. Ți a um nasa an tah! Puithiem lalhai hi thlaraua lâklût (ordain) an ni hlak leiin an ram sûng a hin POWERFUL an nei a nih.
Chuongchun, tuolthattu chungah chun rorêl tâng an ta. A thaw hrâm ani chun a thatnu mani a thatpa sûnghai kutah pelût an ta, an that ve nghâl ding a nih. "Ha aia ha, mit aiah mit" (exo 21:24) kha a nih.
Amiruokchu a lo thawpal leia tuolthat alo ni khawma a la him thei nawh. A him theina ding chun THUHRETU (WITNESS) an lo ngái a nih. Thuhretu khawm chu pakhat chau an pawm nawk naw nghâl a, Isu Krista'n "mi pahni thu andik" (joh 8:17) a lo ti bawk leiin thuhretu hi mipahni an ni a ngai a nih.
Rorêltuhai chun tuolthattu chu a tuolthat leia a thina tieng thu an rêl pha pha thuhretuhai chun rorêltuhai rorêlna chu an kal ding a nih. "A thaw hrâm an nawh, a thaw pal a nih, a hmutu kan ni leiin thuhretu kan nih." hang ti tâng an ta.... chuongchun, thuhretu pahni lei chun tuolthattu chu a him thei an tah.
Hi humhimna kul hai hin vânram an entir a, tulai kohran hai hin thuhretu ei nei ve am? Isu'n, Nikodem a kuomah khan "mi tukhawm tui le thlarauah an piengthar naw chun Pathien ram lût thei naw ni hai" (joh 3:5) a lo ti a, TUI LE THLARAU hi ei ta dinga thuhretu an lo ni tah. Lalpán ropuina chang mawl raw seh. Amen.
Ei thu ni loa suola insieng hai hin thuhretu zarah Lalpa ram ei la lût ding a nih.
Chuongchun le, tuolthattu chu humhimna khuoah chun um tâng a ta, Puithiem siehlaw in țhang tâng a ta, Amiruokchu tuolthattu chun kha humhimna ramri kha a suok ding ani nawh. Ramri a suok a phuba lâktum haiin an lo that vei vei chun hril ding a um ta nawh. An that le an that an ta el.
Joab khawm khan Abner kha Hebron khaw puotieng a that kha, a ramri suok naw sien chu a him el ding ana, a ramri a pêl a, Joab in a lo hmu a a that a nih, chuleiin, David chun "Abner chu mi invêt thiin a thi" tiin a țap a ni kha.
Lalpa sandamna changtuhai hin Lalpa hi suoksan ding ei ni ta nawh. Setan phuba lâ hlak tupa hin ami lo hmu chun a min thla âwm si nawh, suok lovin Lalpa a hin um zing ei tiu aw..
Tuolthattu chun a sûng le kuo, a ram hai mâksan a Puithiem siehlaw a um lei chun harsa ti dingin ei ring el thei amiruokchu khâng khuohai kha puithiem umna bîk ding ruot ana, a thlarau tieng a kâisâng a, a hriet naw Pathieng tieng thil a hriet belsa țeu hlak a nih.
Eini khawm ei in le lo, ei nei, ei sûnghai mâksan a, Lalpa ah ei um hin khawvêl thil ei nuom ang ang hrilin thaw theinaw in la khawm ei thlarau tieng chu a lo kâisâng hlak a nih.
Tuolthattu chu Puithiem a thi hma po chu an kuomah um zing a ta, nuhmei a nei a, nau a lo nei ani khawma Puithiem siehlaw ah an um el ding a nih.
Puithiem a thi pha chun tuolthattu chu a ram tieng a kîr nawk thei tah. Phuba latum haiin an lo that vei vei chun a thisen maw an phur nawk thung ding an tah.
Awleh, tulai ramah hin inhumhimna khuo a um ta nawh, tuolthat hlak chu khap a la ni zing. Vawikhat chu Motor in mihriem a suk a, a khattu chu inrang takin jail a pan a, jail ah a um ta chun an va them thei ta nawh, a suokpha chu an la that thei tho, chuleiin tulai khawvêlah hin inhumhimna ding a um ta nawh.
Chu chu khawvêl tieng lo ni sien, kriestien nun ei hang en a, ringtuhai hi ringna a kalchâwi ei ni leiin Tuolthat thu suol thaw hi a nih. Suol a thi hai hin khawlâm himna hmûng ei ta?
ei châng thlang a chun "Lalpa hming chu kulbîng dettak ana, mifel chu chu taka chun a tlan a, a him hlak" a ti kha.
Lalpa hming hi ei humhimna umsun ani leiin ringtuhai hi Lalpaa himna hmu tum ei tiu aw, a hmu ta haiin a ramri Lalpa hi suoksan lovin det tak chel tlat ei tiu.
Lalpân a thu Malsâwm raw seh! Amen.
By - HR. Hmingsangthang Hmar
No comments:
Post a Comment
Pydtuolzawl blog thar