SIMNA (SERMON BY ELLEN)
Misuol sim lo chun chatuon ram hluo thei naw nih. Suol hrim hrim chun chatuon ramah hmun nei bawk naw nih. Chuleiin misuol sandamtu Isu chun a sim nuom taphawthai chu lawm takin a takin a thangpui hlak. A thisen chu misuol ta dingin a far si a. {KS 12.1}
Iengtinam mihriem chu Pathien lakah fel thei a ta ? Iengtinam misuol chu sukfelin um thei a ta ? Krista zar chauin Pathien le thienghlimna le inremin ei um thei. Nisienlakhawm Krista kawla chun iengtinam fe thei ei ta? Penticost ni-a mipuiin an suol hai an hung inhrietsuoka, “iem ei thaw ta ding?” tia an indawn ang bawk kha tulai khawm hin an lan dawn pei a ni. Peter a dawnna hmasatak chu, “ Sim unla, ” ti hi a nih . (Tirkohai 2: 38). {KS 12.2}
Simna hin suol leia lungngaina le suol nghatsanna a fawmkem a. Suolna hi a suolzie ei hmu naw chun tawpsan thei naw ma nih: suol chu lungril taka ei nghatsan naw chun nuna hin danglamna tak tak um thei bawk naw nih. {KS 12.3}
Simna umdan indik hrechieng thiem lo mi tam tak an um. Mi tam tak chun an thil thawsuol leiin pawi an ti a, an thil thaw indik nawin tuorna dam hung intlun rawi a tih ti an ti leiin puotieng thil insiemthatna dam an nei a. Amiruokchu, Bible tidan chun hieng ang hi chu simna a tling zo nawh. Suolna nek chun tuoma chu pawi an ti lem leiin simna a tling nawh. Essauin a naulutir nina chu kum khuoa dingin an hmang tah ti a hriet a, a lungngaina kha chuongang lungngaina chu a nih. Balaam chun a fena lampuiah vantirko ngunhnam ngei tak chawi a hmu a, a ti ta em em a, chuongchun a thi el ding a ni leiin a suolna chu a pawm ta a; nisienlakhawm suolsimna tak tak dam, tumna danglam le suol theidana a nei chuong nawh. Juda Iskariot khawmin a Lalpa an mantir khan, “Mithiem thisen kan mantir kha thil ka lo suksuol a nih,” (Math 27:4) tiin an puong nawk a nih. {KS 12.4}
Chuongang inpuongna chu a lungril suol a inthawka thiemnaw inchangtirna tium tak le rorelna rapthlak tak titna leiin an thaw luitir mei mei a nih. A thilsuksuol leia thil tium tak ama chunga tla ding khan a suk ti ta em em a, nisienlakhawm Pathien Naupa an mantir lei le Israelhai Mi Inthieng an phatsan leia lungngai beidawng taka a lungril kawina a nunah an lang chuong nawh. Pharao khawm kha Pathienin a hrem lai chun hremna dang a pumpel theina dingin a suolzie chu a hrietsuok a, nisienkhawm Pathien hremna chu a re charin a lungril pangngai a put nawk el. Hieng mi hai po po hin suol leia thil hung um chu pawi an ti a, amiruokchu suolna lei chun an lungngai si nawh. Amiruokchu, mi chu a lungril chu Pathien thlarau thuoina a hung um pha chun, a sie le tha hrietna kha a hung har a, misuol chun Pathien dan, hnuoi le van awpna dan bul inthukzie le thienghlimzie chu a hung hriet thiem tan hlak. “Var tak, mitin suk var hlak, khawvela hung mek,” (Johan 1:9) khan lungril sungril tak hai a hung sun eng a, thimna thuprukhai chu suklangin a hung um ta a nih. Suola inhrietna chun lungril le ngaituona a lo hne hlak. Misuol chun Jehova felna lungril chu a lo nei a, lungril hmutu hmaah a suolzie le a tirdakumzie chu a hung hriet ta a nih. Pathien hmangaina dam, mawina dam le lawmnahai chu a hung hmu thiem a, sukfaia um a, Pathien le inzawm chu a hung nuom ta em em a nih. {KS 13.1}
A tluk hnunga David tawngtaina khan suol leia lungngaina umdan indik chu an entir a; a simna chu dit a umin an thuk a nih. An diknawna thup tumna hrim a um naw a; rorelna tium tlanhmang san inhawkna hrim hrim a tawngtainaa khawm an leng nawh. David chun a bawsiet nasatzie chu a hmu a, a lungril tirdakumzie a hmu bawk a; chuleichun a suolna chu a theida ta em em a nih. Ngaidam nuomna lei ringawtin a tawngtai nawh, lungril thienghlim neina ding khawmin a tawngtai a nih. Pathien le inrem theina le thienghlimna hniin a tawngtai bawk. Pathien le inrema inpawl nawkna le thienghlimnaa lawmna neinawk hi a ngai ngawi ngawi a nih. Hi hi a lungril puok suok chu a nih. {KS 13.2}
“A bawsietna ngaidama um a, a suolna inkhuma um chu a hamtha, {KS 13.3}
Mi Lalpain ritlona neia a ruot naw, a thlaraua hlemna hrim hrim um naw chu, a hamtha.” (Sam 32: 1,2). {KS 13.4}
Aw Pathien, I zainem ang peiin mi lunginsiet la,
I lainatna nasatzie angpeiin ka bawsietnahai hi thaihmang la,
Ka ritlonahai hi mi sawpfai pek var la,
Ka suol hi mi sawpfai pek rawh.
Ka bawsietnahai hi ka hriet ta si a.
Ka suol hi ka hmaah a um rawp hlak a nih.
Husopin mi sukfai la, chuongchun fai ka tih;
Mi sawpfai la, chuongchun vur nekin var ka tih.
Hlimna lawmna chu nain min hriettir la,
I ru sukthliekhai hi a hlim theina dingin.
Ka suolnahaia inthawkin i hmai thup la,
Ka ritlona po po hi thaihmang rawh.
Aw Pathien, keimaa hin lungril in thiengtak siem la,
Ka sunga hin thlarau indiktak siem thar nawk rawh.
I kuoma inthawk hin mi peihawn naw la,
I thlarau inthieng hi mi pe nawk rawh.
Imi sandam hlima chu mi pe nawk la,
Tiawina thlarauin mi chel zing la,
Chuongchun, bawsetuhai chu i lampui chanchinhai
inchuktir ka ta,
Chuongchun, misuolhai chu nanga tieng ngha nawk an tih.
Aw Pathien, nang ka sandamna Pathien, thisen
insuonahaia inthawk chu mi sanhim rawh,
Chuongchun, ka lei hin i felna thu hi hlimtakin hla sak a tih. {KS 14.1}
(Sam 51: 7-14) {KS 14}
Hieng ang simna hi chu ei theinain a tiin bak a nih; chungtienga hang fe, mihriemhai kawla thilthlawn pekhai Petu, Krista kawla in thawk chauin nei thei a nih. {KS 14.2}
Mi tam tak chu hi taka ngei hin an indik naw hlak, chuleitak chun Kristain thangpuina pek a i nuom khawm an dawng thei ngai nawh. An suolhai an sim hmasa zet naw chun Krista kuoma fe thei lo angin an inngaiin an inringa, chun simna chun an suol ngaidamna dingin lampui a buotsai pek niin an ring bawk.Simna chu suol ngaidamna nek chun a hmasa lem a nih ti lem chu an dik ngei, lungril inthuk taka simna hin Sandamtu chu a mamawzie chu a hriet suok hlak. An leh misuolin Krista kuoma a hung thei hmain a sim hun a nghak kher dim a ni? Simna chu misuol le Sandamtu inkara lampui daltu dinga siem am a ni? {KS 14.3}
Bible chun misuolin Krista fielna a ngaiven thei hmain a sim ngei ngei ding a nih tiin an chuktir nawh. “Nangni sin inrim le phurrik phur po po hai, ka kuomah hung un la, keiin chawlna peng ka ti cheu” (Mathai 11:28) a ti lem a nih.Kristaa inthawka suok thatna chu a nih simna indik taka thuoi luttu hlak chu. Peterin Israel mihai kuoma “Ama ngei kha Pathienin Lal le Sandamtua um dingin a changtieng a chawimawi ta a, Israelhai suol insimtir ding le ngaidam dingin” tia a hril khan hi thu hi a sukchieng ta a nih. (Tirkohai 5:31)
{KS 15.1}
Krista thlarauin ei sie le tha hrietna a keitho chau naw chun, suol simna ei nei thei naw a, chu ang bawkin Krista lovin suol ngaidamna a um thei nawh. {KS 15.2}
Krista chu thil indik tinreng thaw tumna bul a nih. Suol dona ding lungrila hung tu thei tu chu Ama chau hi a nih. A thlarau Thienghlimin ei lungril sungah a thawk ti hriet fie tak chu thutakle thil thienghlim ei lo ditna dam, ei suolnahai ei lo hrietna hi a nih. {KS 15.3}
Isun, “Kei hnuoia inthawka khaikanga ka um chun, mi po po keia tieng hip ka tih,” (Johan 12:32) a ti ta si a. Krista chu khawvel suolna leia thi— Sandamtu angin misuol kuoma chun an suklang ngei ding a nih, chun Kalvari Kraws chunga Pathien Beramte ei hang thlirin intlanna thuruk chu ei lungrilah a hung inlang tan a, chuongchun Pathien thatna chun simnaah a mi thuoilut hlak a nih. Misuol ta dinga thiin, Krista chun hrietthiem zo seng ruol lo hmangaina an langtir a.Misuolin hi hmangaina hi a thlirin, a lungril suknemin, a lungril a tawk em em hlak a, suol simna a nei ta hlak a nih. {KS 15.4}
A chang chun mihan, Krista kuomtieng thuoiin an um ti an hriet hmain an suol ching thenkhat an lo tawpsanin, an umdan suolhai chu an lo inzapui hlak ti hi an dik khawp el. Nisienlakhawm, mihan thil indik thaw an nuom leia insiemthat tumna an nei po leh Krista thilthawtheina chu an niah a hung um a nih. An hriet si lo thuneina khan an lungril sungah athawka; chun sie le tha hrietna chu sukhratin a hung um a, puotieng nundan chenna khawm siemthatin a hung um hlak. Kristain Kraws thlir ding le an suolna in ama chu a suknatzie hre fle dinga a hip lai chun, an sie le tha hrietnaa chun thupek chu a hung lut a, an nundan suolzie le an lungril suol inthukzie chu an kuom ngeiah suklang a hung ni a. Krista felna thenkhathai chu an hrietthiem a, “suol hi iem a nih a, intlanna dinga inthawina chuongang hiel a ngai ta el? Hieng hmangaina po po hai, tuoma po pohai le inngaitlawmna po pohai hi ei bohmang nawa, chatuona hringna ei nei lemna dinga ti a ni lem an naw mani,” an ti hlak. {KS 15.5}
Misuol chun hi hmangaina hi a hnawl thei a, Krista kuoma hipa um khawm a nuom naw thei, nisienlakhawm, a selnaw phawt chun Isu tieng hipin um a tih; Sandamna dinga remruotna hrietthiemna chun, Pathien Naupa intuortirtu ama suolnahai chu insimtirin Kraws bula chun thuoi ngei a tih. {KS 16.1}
Pathien thlarau, thilsiem chunga thawtu bawk khan, mihriemhai lungrilah thu hrilin, thil iemanih an la nei lo nei nuomna ropui tak an lungrilah a pek a, a ditzawng chu khawvel thilhai hin a sukkhawp zo nawh. Pathien thlarau ruok chun muongna le chawlna pe thei— Krista lunginsietna le thienghlimnaa lawmna chau a zawngpui a. Ami Sandamtu chun thil hmuthei le hmutheilohaiin suol inhawi chenna nghawktheinawna a inthawk, malsawmna tawp theilo chu mihan amaa an nei thei lemna dingin an lungril thuoi dingin a thaw zing a nih. Dangchar taphawt kuoma thucha chu, “Dangchar taphawt chu hung raw se, a nuom taphawtin hringna tui hi a thlawnin la raw se” (Thupuongsuo 22:17) ti hi a nih. {KS 16.2}
Hi khawvelin a pek thei neka thil iemani tha lem in lungrila in chak hin, chu chakna chu in lungrilah Pathien rawl angin in lo hriet a. Krista chu a hmangaina tawp lo le a thienghlimna famkim chu in kuoma a hung suklang theina dingin simna pe ding cheuin , Pathien chu hni hlak ro. Sandamtu hringnuna chun Pathien dan bulpui-Pathien le mihriem kuoma hmangaina chu famkim taka inlangtir a nih. Thatna le mani hmasiello hmangaina chu a nunphung a nih. Ami Sandamtu chu ei hang thlir a, ama a inthawka engna ei chunga a hung tlung hin ei lungril suolziehai chu ei hmusuok hlak a nih.
{KS 16.3}
Nikodem a angin ei umdan a fel tawkin ei nungchang an dik tawk an nawm tiin mani ei lo infakel khawm a ni thei a, misuol danghai angin Pathien hmaa chun inngaitlawm khawm ngaiin ei inring naw bawk thei a, nisienkhawm Krista kuom a inthawk engnain ei lungril a hung sun eng zet chun ei thienghlim naw zie chu hmu thei ei tih. Mani hmasielna dam, Pathien dona dam, nun suktirdakum thei thil hrim hrimhai chu hmu chieng thiem tang ei tih. Ei felna chu silfen tirdakum ang ngei a lo nih ti dam hrieng ei ta, chun, suol tirdakum intlengfai thei lo ei lungrilhai sukthar theitu chu Krista thisen chau kha a lo nih ti dam hrieng ei tih. {KS 16.4}
Pathien ropuina eng le Krista thienghlimna engin lungril a hung sun eng hin ei pawrchena tinrengel a hung inlang fie a, chun, mihriem nungchang famkimnawnahai a hung suklangsar vawng bawk hlak a nih. Ditna thienghlim lo dam, lungril pawrche dam le tawng pawrche chenin a hung suklang chieng hlak. Mi suolin Pathien dan hnawla thil indiknaw a lo thaw tahai chu ama mithmu ngeiah suklangin a hung um a, chuongchun a lungril chu Pathien thlarau enfienaa chun a hung na ta hlak a nih. Krista nunchang pawrche nawzie le thienghlimzie a hang thlir lem chun ama le ama a lo intirdak em em hlak.
{KS 17.1}
Zawlnei Daniel chun vanram palai a kuoma hung tirthlak, ropuina huol vel a hang hmu chun a hratnawzie le a famkimnawzie inhrietna ngawtin a sip a, a thil hmu makzie hrilfie nadingin hieng hin a hril. “Kei maa hin hratna hrim hrim a um ta nawh a, ka hmel mawina chu sietnaah an chang ta leiin, hratna hrim ka nei ta nawh a.”(Dan 10:8) tiin. Thlarauva chuong ang a lo tuok zet chun a duamnahai dam kha a theida em emin mani le mani inhmangaina dam a hung tirdak ta hlak a nih. Krista felna zara chun Pathien dan le Krista nunchang le inremna lungril chu zawng lem tang a tih. {KS 17.2}
Paula chun, “Dan thua felna tienga chun,” puotieng thilthaw chungchanga chu, “sawiselbo” an ti a (Philip 3:16) nisienkhawm thlarau tieng dan chungchanga chun mi suol anih ti ama ngei a lo inhmu a.Puotieng nundana mihriemhai dan ziek anga relnaa chun suol lo dingin an sum thei a; nisienkhawm dan thienghlim inthukzie dam a zuk thlir a, Pathienin ama a zuk hmu anga ama le ama a zuk inhmufie zet chun, an ngaitlawm ta em em a, “Chun kha hma khan kei dan lovin ka hring a, nisienlakhawm thupek chu a hung um phing leh suolna chu a hung har a; kei chu ka thi ta a.” ( Rom 7:9) a tih. {KS 17.3}
Pathien chun suolna po po hi angkhat vawngin a ngai nawh a. Thil suksuola hin mihriem ngaidan khawm an ang nawh. Amiruokchu Pathien mithmua hin chu chin taluo hrim hrim a um nawh. Mihriem rorelna chu mani hmasielna le famkim lo a ni a. Pathien ruok chun thil iengkim el hi an nina ang takin an khi vawng a nih. Zurui chu hmusit a ni a, a suolna leiin vanram kai naw ni tia hril a nih. Chulaizing chun chapona amani le hmasielna le inhnarnahai hi endawng an ni naw a, nisienkhawm Pathien theida zawng an ni rieu si. A nungchang. hmangaina le chun an kal tlat si a, chu hmangaina chu khawvel suol hmaa ta kha a nih. Suolna rapthlak taka tlu chun inzak a umzie le a rimsikthlakzie le Krista lunginsietna a mamawzie chu a hrietsuok hlak..Mi chapo thung ruok chun chuong ang mamawna chu a hriet ve naw a, chuongchun Kristain malsawmna tawp thei lo pek a turn kha a lo dang hlak a nih. {KS 17.4}
“Pathien, kei misuol hi mi lunginsiet rawh”, tia tawngtai tu siekhawntu khanmidangin ama an hmu angin ama chu mi suolah an ngai a, nisienkhawm, a mamaw tak chu a hriet a, a suolna leia inzak em em pum chun Pathien kuomah zangaina hni dingin a hung ta a ni kha. A lungril chu Pathien thlarauin sin a thaw thei nadingin le suol thilthawtheina a inthawka a lo zalen thei nadingin a hawng tah a nih. Chun, pharisai chapo le fela inngai tawngtaitu ruok kha chun, Thlarau Thienghlim thuneina a dit naw thung a nih. Pathiena inthawka a hla em lei khan, Pathien thienghlimna tak khawm a hriet naw a, iengkhawm a dawng bawk nawh. {KS 18.1}
I suol zie i hmu phawt chun insiem that deu hun nghak naw rawh. Mi tam tak chun Krista kuoma fe ding chun tha tawkin an inring ngai naw a, an leh nang, mani theinaa that thei deu lem in ring am chu? “Ethiopia mi chun a vun chu a thlengin, keite khawma a zie chu a thleng thei am a ni? Thil tha naw thaw ngaia hmanghai hin thil tha chu an thaw ding am a ni?” (Jeremi 13:23) Pathiena chau hin ei ta dingin thangpuina a um a, turtu lien lem ei nghak ding a ni nawh a, hun tha lem khawm ei zawng ding a ni bawk nawh. Ei ni ngawtin iengkhawm ei thaw thei si naw a, ei nina ang chie hin Krista kuomah ei fe el ding a nih. {KS 18.2}
Pathien chun a lunginsietna dit nawtuhai khawm a hmangaina le zangaina chun la sandam tho a tih, tiin tukhawm inhlem fawm naw raw se. Suolna rapthlakzie chu Kraws enga chau khan ngaituo thei a nih. Mihaiin, mi suol peihawn ding chun Pathien chu a tha taluo a nih an ti chun Kalvari tlang tieng thlir raw se. Mihriem sandamna ding kawng dang hrim a umnaw lei le hi inthawina thang lo hin chu mihriem ta dingin suol thilthawtheina a inthawkin suok theina ding lam dang hrim a um thei naw ding a ni leiin Krista khan thuawinawna suol chu a chungah innghatin mi suolhai aia chun a hung tuor ta a nih. Pathien Naupa thina le tuoma le hmangaina hin suol rapthlakzie an entir a, Krista thlarau intuklutna zara chau naw chun nundan in sang lom beiseina le suol thilthawtheina a inthawka himna chu a um nawh ti a suklang chieng bawk. {KS 18.3}
Mi, suolna la sim nawh hai chun, a chang chun anni inthiemfawmin Kristien nanran hai ang thovin, “Kei khawm an ni tluk chun ka tha ve tho, an umdanah kei aneka mawina le mani inphatna a um bik chuong nawh. Keima ang bawkin inhawi chenna an ngaina ve tho si, ” tiin. Chuongchun thil thawding an thaw pei si naw thupna dingin midanghai indiknaw chu an hril a. Midanghai suolna le an tlinnawna chun tukhawm a ngaidam chuong nawh. Lalpa chun en tawn ding mihriem indiknaw tak a mi pek si nawh. Ei entawn dingin Pathien Naupa suolna neilo a mi pek lem a ni si a. Chuong Kristien nundan sawiseltuhai chun, nundan mawi lem le entawn tlak lem an inentir lem ding a nih. Kristien umdan ding insang tak an hriet si chun, an suolna chu a nasa lem naw dim a ni?. Thil indik chu an hriet a, an thaw nuom chuong der si nawh. {KS 19.1}
Nakie leh tina lakah in veng fimkhur rawh. Krista zara lungril thienghlim zawngna le i suolhai ngaidamna ding chu ngaitha naw rawh. Mi sang tamtakin hitaka hin an thawsuol a, chatuon hringna an chan pha hlak a nih. Hi taka hin hringna tawi le chiengkuong thu hril rak ka tum naw a, amiruokchu thil tium tak, a titumzie hril thiem ruollo chu a um a, chu chu thlarau thienghlim kona awivat lova, suola um zingna hi a nih, chuongang vuoichana chu thil suol tak khawm a ni nghe nghe a nih. Suol chi te rek khawm hi chatuon boralnaa a mi thuoi lut theitu a nih. Ei i hnenaw khan, ei ni mi hne letin chatuon boralnaah a min tlun thei a nih. {KS 19.2}
Adam le Evi chun theira fak phallo fak mei mei chu ieng tham khawm ni lo a, Pathienin a ti ang em em khan chu thil tium tak hung tlung naw ni tiin an ngai niin an lang a. Amiruokchu thil chiterek rekhai khawm hi Pathien dan danglam theilo le dan thienghlim bawsietna chu a lo na, chun, mihriem chu Pathiena inthawkin thethlakin a lo um ta bawk a, suolna chun thina tuilien kawtkhar le lunginzingna hrilthei ruollo chu ei khawvela hin a hung hawng ta a nih. Tienlaia inthawka tulai chen hin mihriem thuawinawna leiin ei huoia hin lungngaina inrumri chu chatlak lovin a hung um a, thil siem pumpuihai chu rinum tuorin an inrum hlak a nih. Van ngei khawmin Pathien dodala mihriem helna chu a lo hriet a. Pathien dan bawsietna laka thawidamna intlanna maktakel hrietzingna angah Kalvari hi a hung ngir ta a. Suol hi thil mei meiah ngai naw mei niu. {KS 19.3}
Dan bawsietna hrim hrimhai le Krista lunginsietna thlathlamna manih hnawlna hrim hrimhai hi nang achunga bawk a tia nawk hlak a nih. Lungril a suk-ngarin ditthlangna a suksiet a, hrietthiemna a suk chawlawl a, chun, Pathien Thlarau Thienghlim fielnaah an tlukluttir naw che el bakah i hnai theina khawm a suk chau a nih. {KS 20.1}
Tam tak chun suolna lampui chu an nuom hun hunah thlak theiin an in ring a. Zangainaa fielna chu an suknawmna theiin an inring bawk a, nisienlakhawm, chuong chun an lungril chu a tawk hle nawk bawk si a nih. Lunginsietna thlarau an hmusit hnunga an ditthlangna chu Setan atieng an pek hnung khawmin an lampui chu sukdanglam thut thei niin an inring hlak. Nisienlakhawm chuongela awl-ai chu an nawh. Dam sunga thil hrietchieng le lekhathiemna hin nungchang chu a lo hruol nasa ta a, chuleiin mi tlawmte chauin Isu anga um an nuom ta hlak a nih. {KS 20.2}
Lungrila thil suol thaw nuomna pakhat chau amanih nunchang indiklo pakhat el khawmin Chanchin Tha thilthawtheina chu a suk khawlo thei. Suola inhnelna tinreng hin lungrilin Pathien a theidana kha a sukzuol a nih. Mi Pathien ringnaw amanih, Pathien thutaka danglamna a neinawzie mani suklangtu chun ama tu ngei kha a sik nawk ding a nih. “Mi suol chu a suolna hrui ngeia khitdein um a tih,” (Thuvar 5:22) ti Thuvarin a hril neka suol chite khawm a ti-umzie hrilna thu Pathien Lekhabuah a um chuong nawh.
{KS 20.3}
Krista chu suolnaa inthawkin min tlansuok dingin an pei sa zinga, nisienkhawm, ei ditthlangna chu a mi thawlui chuong nawh, dan ei bawsiet rawp chun ei ditthlangna ngei khawm kha suol tieng a lo kawi a, chun, zalen taka um khawm chu ei lo nuom ngai naw a, a lunginsietna ei pawm nuom si naw chun ei ta dingin thildang iem thaw thei tang a ti leh? A hmangaina ei lo hnawl hin eini le eini ei insukbohmang fawm a nih. “Ngai ta u, tu hin hun lawmum chu a nih, ngai ta u, tu hi sandamna ni chu a nih,” (II Kor 6:2) “Vawisun hin a rawl in hriet chun, in lungril sukkhau naw ro,” (Heb 3:7,8).
{KS 20.4}
Mihriem chun puotieng inlangdan a thlir a, Lalpa ruok cun lungril tieng a thlir hlak. (I Samuel 16:17). Mihriem lungril, lawmna le lungngaina lungril, lungril kawmawbawla invakhmang hnung, pawrchena le hlemnaa sip hi a nih a thlir hlak chu. A changzie le a thiltumhai chu a hriet a. Sam phuoktuin iengkim hmutu kuoma a pindanhai a hawng pek angin, I suol tirdakum po po le chun ama tieng pan rawh. Sam phuoktu chun, “Aw Pathien, nguntakin mi en suok la, ka lungril hi hre rawh, mi fie la, ka ngaituonahai hi hre rawh. Chun, kei maa hin ritlona kawng hrim hrim a um le a um naw en la, chatuon lampuia chun mi thuoi rawh,” (Sam 139:23,24) a tih. Lungril hi intlengfai a ni hma khat chun tam takin Pathien angna nei, lungrila, a hrieta hrietna sakhuo chau an lo ring hlak. I tawngtaina chu, “Aw Pathien, kei maa hin lungril thienghlimtak siem la, ka sunga hin thlarau indiktak siem thar nawk rawh,” (Sam 51:10) ti hi ni raw se. Nanga lungril ngeiin khun takin sut rawh. I hringna a hung tawp ding tepa i umdan nuomzawng anga um dingin thahnem ngai rawh. Hi hi nangma le Pathien inkara siemfel ding thil, chatuona dinga siemfel ding chu a nih. ‘Ani el thei’ ti mei mei beiseina chun i sietna hung intlun lem a tih. {KS 21.1}
Pathien thu chu ngun takin tawngtai pumin inchuk la, Pathien dan le Krista hringnaa chun Pathien thu chun thienghlimna bulpui ropuitakel a hung inhrietir che, chuong naw chun, “Tukhawmin Lalpa hmu naw nih hai,”(Heb 12:14). Chu thu chun suolna chu hung inhriettirin Sandamna lampui chu mawl takin a hung puong a nih. Chu thu chu i lungrilah Pathien rawl in a thu a hung hril angin ngaiven rawh. {KS 21.2}
Suolna nasatzie i hmu a, i nina ang taka nangma ngei i hang inhmuin beidawng el naw la, Krista chu mi suolhai sandam dingin a nih a hung hrim ni.Ei nin Pathien chu ei va rem el ding ni lovin, nisienlakhawm, hmangaina maktak Kristaa chun Pathienin, “Khawvel hi ama leh inremin a siem a,” (II Kor 5:19) Pathien chun a nauhai lungril suol tak chu a hmangaina chun a thlem zing a, Pathienin sandam dinga a zawnghai chunga a dawtheizie ang le a zaidam ang hin, hnuoia nu le pahai hin an nauhai, dan bawsietu, chuong taka innema thlem thei an um bawk nawh. Aman invakhmanghai kuoma fielna thu ditum a hril ang neka ditum le mawia hril thei mihriem hrim hrim an um si nawh. A thutiem po po le an hrietlawktirna po pohai hi hmangaina hril thiem ruollo chu an ni lem si. {KS 21.3}
Setanin, “Mi suol i nih” tia a hung hril che chun, i tlantu hang en la, a thatna thu hril rawh. Nang a thangpuitu ding che chu ama engna tieng thlir hi a nih. I suol chu thup naw la, chun, “Krista Isu misuolhai sandam dingin khawvela hin a hung,” (Tim 1:15) ti le a hmangaina mak tak chun a sandam thei che a ni ti hi i hmelma chu hril la. Isun leibattu pahnihai chungchang thu Simon an dawn khan, “pakhat chun tlawmte a bat a, a dang chun tam tak, nisienkhawm, an pahni chun a ngaidam ve ve ta a, a tu lem chun am Lalpa hmangai lem ding,” tiin an dawn a, Simon chun, “A ngaidam tam lem chun,” (Luka 7:43) tiin a dawn a. Mi suol tak vawng ei ni a, nisienkhawm, ngaidama ei um theina dingin Krista a thi ta a. Pa hmaa ei ai a pek ding chu an thawina hlu tak chu a hun tawk hle a nih. A ngaidam nasat satin ama hmangai zuol an ta, a hmangaina ropui le an ta dinga an thawina chawimawiin a lalthutthleng hnai hnaiah ngir an tih. Pathien hmangaina hi ei hriet nasat zo po leh suol rapthlakzie hi ei hriet chiengel a lo nih. Ami khit thlutu suol khaidiet seizie ei hmu a, Kristain ei aia inthawina a siem, tawp chin nei lo ei hang hrietthiem hin ei lungril chu suol hrietna le zaidamnain a hung intui hlak a nih.
{KS 22.1}
PYDTUOLZAWL
