THIENGHLIMNA ~ PART -1

THIENGHLIMNA- PART-1

"Thienghlimna țhanglo chun tukhawmin Lalpa hmu naw nihai."  HEBRAI 12:14

Ringtu nun kalchâwina a hin zâwm intak  tak chu THIENGHLIMNA hi a nih.

Thuthlunghluia "thienghlim" le "thienghlimna" hi Hebrai țawng chun "qadas" a nih a. "thienghlim, ser hran, hlan thienghlim" tina ani deu tak.

Leviticus 19:2-3, ah "Israel thla pungkhâwmhai kuoma chun hril rawh : In inthieng ding a nih, kei LALPA in Pathien hi kân thieng sih a. Mi tinin in nu le pahai in inza ding a nih, chun ka châwlnihai hi in inser ding a nih. Kei hi LALPA in Pathien chu ka nih." tiin ei hmu a. 

Ngun taka ei tiem chun Thienghlim zing dinga Lalpa ami phût a nih ti an lang thei nghâl a nih.  

Thuthlung tharah Greek țawng chun "hieros'' ti hi vawihni a hmang a ( 1kor 9:13, le 11Tim 3:15). Thuthlung hluia mi kha Sakhaw thil tienga thienghlimna a kâwk a,  Korinth lekhathawn a mi hi HMAR țawng chun "thil inser" ti anih  a.  Timothe zieka mi nâwk hi chu "lekha thienghlim" ti ani dei thung.

Hmang lâr tawk ruok chu "hagios" ti a nih a, Pathien lakah ei thienghlimna ding hrilna ani deu vawng lâiin, "hoisios" ti hin Pathien ta dinga thilțha thaw dinga inpêkna  tieng a kâwk. Thuthlung thara hin vawiriet lâi hmang a ni bawk a nih. Hieng bâkah Greek thumal "thienghlimna" ti thova hmang chu "hosiotes" ti a nih. Vawihni chie a hmang a nih (Luka 1:75, Ephesi 4:24).  hi bâkah thienghlimna ti hmangna'n thu pakhat "osme" an hmang bawk a, chu chu vawikhat chie hmang a nih (1thes 2:10).

Paula'n Pathien suklâwm dân ding nunchang a hrilna a chun "Pathien ditzâwng, inthienghlimba ding chu hi hi a nih, inngai hi bânsan unla,...... " Pathienin thienghlim dingin ami ko a, a pawisa nawtu chu Pathien thlarau thieng pawisa naw a nih (1 thes 4:3-8) a lo ti hiel bawk.

Lalpa rawngbawltu indiktak chun a thlarau el chau ni lovin a taksa khawm hi an suk thienghlim ding a nih. Insifâi / insâwpfâi el a kâwk nawh, zuk le hmuom, sada, biri hai chen chen thaw zinga Lalpa rawng bawl hi Pathien Thlarau thupêk a zâwm naw a nih.

Tirko Paulân, "Tukhawmin Pathien in chu a suk khawlo chun Pathienin ama khawm sukkhawlo vêng a tih; Pathien in chu an thieng sih a, chu in chu nangni in nih." (1Kor 3:17) a lo ti tlat.  Thuvar pakhat chun, "Fâi hi Pathien dawttu (angna) a nih" ti ani bawk. 

Mani in seng hi fâi sien ei tih a, ei sukfâi a, ei hrefâi a, Pathien khawmin a in - ringtuhai hi fâi in la, thienghlim inla, a mi dit êm êm a nih. Lalpa umna Sinai tlang, Mosie ngîrna hmun khawm khawm kha hmun thienghlim a ni kha (exo 19: 23, 3:5). Lalpa umna ei ni chun ei thienghlim ngei ding a nih.

Pathienin Israelhai kuomah, "An kuomah ka chêng theina dingin, HMUN THIENGHLIM mi siempêk raw hai seh" (exo 25:8) a ti a. Lalpa hi hmun tirdakumah a chêng nuom nawh . "Mithienghlim lâwr" ei ti khawm hi mi thienghlim naw chu Lalpân lâwr naw nih. Lalpa kuoma um nuom taphawt chun eiin suk thienghlim ding ani âwm ie (1pet 1:15,16)...